பாயும் வேகம் ஜெட் லீ தாண்டா
பன்ச் வெச்சா இட்லி தாண்டா
Rated PG - for Pseudo-DK, DMK, Liberals, Marxists....
ஊர்ல சொல்றது சொலவடை
உண்மையைச் சொல்றது இட்லிவடை

Monday, October 29, 2012

மலர்கள் பேசினால்... - ச.சங்கர்

இன்ஸ்பெஸ்டர் ஆனந்த் ஹோனப்பாவுக்கு பெங்களூருவுக்கு அருகில் ஒரு சின்ன புறநகர் காவல்நிலையத்தில் வேலை பார்க்கிரோமென்ற வருத்தமெல்லாம் துளிக்கூடக் கிடையாது. அவ்வளவாக வீடுகள் இல்லாமல் கண்ணுக்கெட்டிய தூரம் வரை இந்தக் குளு குளு பசுமையும், நாசியைத் துளைக்கும் புதிதாய்ப் பூத்த பூக்களின் நறுமணமும் கோடி கோடியாக கொட்டிக் கொடுத்தாலும் நகரங்களில் கிடைக்குமா?

ஆனந்துக்கு பூக்களென்றால் அவ்வளவு பிடிக்கும். காலேஜில் கூட தாவரவியல்தான் படித்தார்.அப்புறம் எப்படியோ ஒரு சந்தர்ப்பவசத்தால் போலிஸில் சேர்ந்துவிட்டார். வேலை பார்த்த போலிஸ் நிலையத்தைச் சுற்றி தோட்டம் போட்டு பூச்செடிகளைப் பராமரிப்பதும் அவரின் விடாமுயற்சியில் விளைந்ததுதான். ரோஜா,மல்லிகை,சம்பங்கி,ஹைட்ராஞ்சியா என எல்லாப் பூச்செடிகளும் பூத்துக் குலுங்கி மணம் கமழ்ந்தாலும், சின்னச் சின்ன பூக்கள் ஒன்று சேர்ந்து, ஒரு பெரிய பின்க் வண்ணப் பூப்பந்து போல காட்சியளிக்கும்கும் ஹைட்ராஞ்சியா மலர்களின் அழகு கண்ணைக் கொள்ளை கொள்ளும்.வசந்த காலம் தொடங்கி விட்டால் ஆனந்த் சின்னக் குழந்தை போல் குதூகலிப்பார்.

இந்த வருடம் செடிகள் பூக்கத் துவங்கிய போது ஆனந்திடம் எந்த உற்சாகமும் இல்லை. தன் அறைக்குள்ளேயே முடங்கிக் கிடந்தார்.தோட்டத்தையும் பூக்களையும் ஏறெடுத்தும் பார்க்கவில்லை.சின்னச்சின்ன விஷயங்களுக்கெல்லாம் எரிந்து விழுந்தார்.அவருடன் வேலை பார்த்த அனைவருக்குமே அவர் நிலைமை வருத்தமளிப்பதாக இருந்தாலும் அனைவருக்கும் அவரது இந்த நிலைமைக்கான காரணம் தெரிந்தே இருந்தததால் அவர்களால் ஒன்றும் செய்ய முடியவில்லை.

அவர் இன்னும் திருமதி சாரதா பசவப்பாவை மறக்கவில்லை.
ஆனந்தையும் சாரதாவையும் அறிமுகம் கொள்ள வைத்ததே இருவருக்கும் பூக்களின் மேலிருந்த அதீதக் காதல்தான்.போன வருடம்தான் சாரதாவும் பசவப்பாவும் மைசூர் ரோடில் உள்ள அந்த பங்களாவில் குடி புகுந்தார்கள்.வந்த கொஞ்ச நாட்களிலேயே அந்த பங்களாவின் முன்புறமிருந்த கேட்பாரற்றுப் பாழடைந்து கிடந்த தோட்டத்தை சாரதா மாற்றியிருந்த விதம் மாயவித்தை என்றுதான் சொல்லவேண்டும். பதியனிட்டு அரும்பி நிற்கும் ரோஜாக்களும்,பங்களாவின் சுவரைத் தழுவிப் படர்ந்து நிற்கும் முல்லைப் பந்தலும் நடுவிலுள்ள இடங்களிலெல்லாம் சீராக வெட்டப்பட்ட புல்வெளி என்று எங்கு திரும்பினாலும் பச்சைப் பசேல் என்று இரண்டே மாதத்தில் அந்தப் பங்களாவின் முன்புறத் தோற்றமே மாறிப்போயிருந்தது.காம்பவுண்ட் சுவரின் உள் புறமெங்கும் வரிசையாக ஹைட்ராஞ்சியா செடிகள் புதரைப் போல வளர்ந்து பின்க் நிறப் பூப்பந்துகளுடன் காட்சியளித்தது.

ஆனந்த் நாற்பது வயதை நெருங்கிக் கொண்டிருக்கும் கட்டை பிரம்மச்சாரி.சாரதா அவரை விட இரண்டு அல்லது மூன்று வருடங்கள் சின்னவளாக இருக்கலாம்.ஆளை அடித்துப் போடும் அழகெல்லாம் கிடையாது.ஆனால் அவள் முகத்தில் நிரந்தரமாகக் குடியிருக்கும் வசீகரப் புன்னகை யாரையும் ஈர்க்கும் காந்த சக்தி கொண்டது.

தினமும் அவள் வீட்டு வழியாக ஜீப்பில் போகும் ஆனந்த் தோட்டத்தின் அழகையும் நேர்த்தியையும் ரசித்த படியே செல்வார். ஆனந்த் இயல்பிலேயே பெண்களோடெல்லாம் அதிகம் பேசிப் பழக்கமில்லாதவர்.அப்படிப்பட்டவர் ஒரு நாள் பொறுக்க முடியாமல் ஜீப்பை நிறுத்தி,அவள் வீட்டுத் தோட்டத்தில் நின்று கொண்டிருந்த சாரதாவிடம் போய் பக்கா போலிஸ் தொனியில் " இந்த ஏரியாவிலேயே அழகான தோட்டம் உங்களுடையதுதான் " என்று சொல்லிவிட்டு சாரதா பதில் சொல்வதற்குள் விடு விடுவென்று வந்து ஜீப்பில் ஏறிச் சென்றுவிட்டார்.சாரதா அதே புன்னகை தவழும் முகத்துடன் அவர் போன திசையை ஆச்சரியமாகப் பார்த்தாள். ஒரு பெரிய நட்பின் கோலாகலமான துவக்கமாக இல்லாவிட்டாலும் கூட , வாரம் ஒரு முறையாவது அந்த வழியாகப் போகும் போது ஜீப்பை நிறுத்தி தோட்டத்தை ரசிப்பதென்பது ஆனந்தின் பழக்கமாகிப் போனது.சாரதாவின் கனிவான புன்னகையும், அவர் வரும் போது தரும் தேநீர் பிஸ்கட் உபசரிப்பும் சாரதாவிற்கும் அவரது வருகை பிடித்தேயிருந்தது என்பதைக் காட்டியது.

ஆனால் பசவப்பாவை முதல் முறை பார்க்கும் போதே ஆனந்திற்கு ஏனோ பிடிக்காமல் போனது.அவரது சற்றே நீண்டு வளைந்த மூக்கும் ஆளைக் குத்தும் பார்வையும் கழுகை நினைவுபடுத்தும்.ஆனந்த் அவரிடம் தோட்டம் மற்றும் பூக்களின் அழகு பற்றிப் பேசும் போது பசவப்பாவின் முகம் போன போக்கே அவருக்கு இதிலெல்லாம் துளிக்கூட ஆர்வம் இல்லை என்பதைத் தெள்ளத் தெளிவாக்கியது.

"அவருக்கு இந்த தோட்டம் பூக்கள் இதிலெல்லாம் ஒரு ஈடுபாடும் இல்லை. ஆனால் எனக்குப் பிடிக்கும் என்பது வரை புரிந்து வைத்திருக்கிறார்.அது வரைக்கும் கடவுளுக்கு நன்றி சொல்ல வேண்டும்.இவரும் மாதத்தில் பாதி நாள் வெளியூர் போய் விடுகிறார். நான் தனியாகப் பொழுதைக் கழிப்பதற்கு, இந்தத் தோட்டம்,செடி ,கொடி ,பூக்கள் மட்டும் இல்லை என்றால் எனக்கு இன்னேரம் பைத்தியமே பிடித்திருக்கும் " என்பாள் சாரதா.

சாரதாவிற்கும் ஆனந்துக்குக்கும் இடையில் ஏற்பட்ட நட்பு , காதல் சம்பந்தப்பட்டதெல்லாம் இல்லை என்று அந்த ஊருக்கே நன்றாகத் தெரியும்.இந்த நட்பை அப்படியெல்லாம் கிசு கிசுவாகத் திரித்துப் பேசக் கூட அவர்களுக்கு போரடித்தது.ஏனென்றால் ஆனந்த் ஒரு டிபிகல் போலிஸ்கரர்.சாரதாவோ காதல் கிசு கிசுவில் அடிபடும் அளவுக்கு அழகானவளும் அல்ல. அதனால் சாரதாவும் ஆனந்தும் அடிக்கடி சாரதா வீட்டுத் தோட்டத்தில் நின்று பேசிக்கொண்டிருந்தாலும் அவர்களது முதுகுக்குப் பின்னால் கூட யாரும் அவர்களது நட்பைப் பற்றி தவறாக கிசுகிசுப்பதில்லை. ஆனால் சில மாதங்களிலேயே இருவரது அடிமனத்திலும் அடுத்தவர் மேல் ஒரு ஈர்ப்பு உருவாகியிருந்தது.ஆனால் இருவருமே அதைப்பற்றி நேரடியாகவோ அல்லது மறை முகமாகவோ அடுத்தவருக்கு உணர்த்த முற்பட்டது கூட இல்லை.

ஆனந்தின் மேல் ஏற்பட்டு விட்ட அதீத நம்பிக்கையில் சாரதா பேச்சுவாக்கில் எப்போதாவது தன் கணவர் பசவப்பாவைப் பற்றி சொல்வதுண்டு.அப்படி ஏதாவது சொன்னாலும் ,சொல்லக் கூடாததைச் சொல்லி விட்ட மாதிரி பாதியிலேயே பேச்சை மாற்றி விடுவாள்.அப்படி ஒரு முறை பசவப்பா பற்றிச் சொல்லும் போது சாரதா "அவருக்கு மனநிலை சரியில்லையோ என்று எனக்கு மிகவும் கவலையாக இருக்கிறது. ஏதாவது வியாதி என்றாலாவது சரி பண்னலாம்.ஆனால் இவருக்கிருப்பதோ யாராலும் சரி பண்ண முடியாத ஒரு நிலை..அளவுக்கு அதிகமாக எதிர்பார்த்தவனுக்கு எதுவுமே கிடைக்காத மாதிரி வாழ்க்கையின் மேல் எப்போதும் ஒரு வெறுப்பு.எதையும் பிடிப்பதில்லை யாரையும் பிடிப்பதில்லை" என்றாள்.

"ஏன்? வாழ்க்கையில் அவருக்கு எல்லாமும் தான் நிறைவாகக் கிடைத்திருக்கிறது..நீ உட்பட" என்றார் ஆனந்த் தனக்கே உரித்தான பாணியில் முகத்தில் அடித்தமாதிரி.
"அவருக்கு வீட்டுக்கு வரவே பிடிக்கவில்லை.வாயைத் திறந்து அப்படி ஒரு நாளும் சொன்னதில்லை.ஆனால் எப்பொழுது அடுத்த டூர் கிளம்புவோம் என்பது மாதிரியே பட்டும் படாமல் இருப்பார் "

"என்ன சொல்ல வருகிறாய் ? அவருக்கு உன்னைப் பிடிக்க....?" என்று கேட்க ஆரம்பித்து விட்டுப் பின் அடுத்தவரது அந்தரங்கத்தில் நுழைய முற்படும் தன் தவறை நினைத்து நாக்கைக் கடித்துக் கொண்டு கேள்வியைப் பாதியிலே நிறுத்திவிட்டார்.

"அவரை நான் எந்தக் குற்றமும் சொல்லவில்லை. இன்னும் சொல்லப் போனால் அவரிடம் நான் எதுவும் கேட்பது கூடக் கிடையாது.ஏதாவது கேள்வி கேட்டாலும் அவருக்குப் பிடிக்காது.எரிந்து விழுவார். சில சமயம் அவரைப் பார்த்தலே எனக்குக் கொலை நடுக்கமாக இருக்கும்.இத்தனைக்கும் அவர் என்னை மிரட்டியதெல்லாம் கூடக் கிடையாது.அவரது செயல்பாடுகளே அப்படிக் கொடூரமானதாக இருக்கும் " என்றாள் குரலில் இழையாடும் சோகத்துடன்.

ஆனந்துக்கு சாரதாவின் மெல்லிய கைகளைப் பிடித்துக் கொண்டு ஆறுதல் சொல்லவேண்டும் போல இருந்தது,ஆனால் ஒன்றும் சொல்லாமல் மெளனமாக சாரதா கொடுத்த டீயை உறிஞ்சியபடி தோட்டத்தை வெறித்தார்.அது கிட்டத்தட்ட கோடையின் கடைசிக் காலம்.இருந்தும் தோட்டத்தில் பின்க் வண்ண ஹைட்ராஞ்சியா மலர்ப் பந்துகள் அழகாகப் பூத்துக் குலுங்கியிருந்தது.

செப்டம்பர் மாதம் பத்தாம் தேதி சாரதா சுடப்பட்டாள். .32 மிமி ரிவால்வரின் சத்தம் நடு நிசியில் அதிர்ந்து அக்கம் பக்கம் உள்ளவர்கள் அனைவரையும் எழுப்பி விட்டது.வெடிச்சத்தமும் பின் தீனமான அலறலும் கேட்டு அக்கம் பக்கம் உள்ளவர்கள் சுதாரித்துக் கொண்டு காவல் நிலையத்துக்குப் போன் பண்ணுவதற்குள் காலம் கடந்து விட்டது. சாரதா இறந்து போன செய்தி மறுநாள் காலைதான் அவருக்குத் தெரிய வந்தது.அன்றிரவு ட்யூட்டியில் இருந்த கான்ஸ்டபிள் உடனே இரவோடிரவாக தனக்கு தகவல் தெரிவிக்காததற்காக ஆனந்த் இன்று வரை அவரை மன்னிக்கவில்லை.

அந்தக் கொலைக் கேசை விசாரித்த போது ஒரு பற்றற்ற மூன்றாம் மனிதரின் பாவனையுடன்தான் ஆனந்தின் விசாரணை இருந்தது.பசவப்பா சொன்ன கதையையும் அதே பாவனையில் தான் கேட்டுக்கொண்டாரேயன்றி வேரொன்றும் சொல்லவில்லை.
பசவப்பா "காலை 2 மணி இருக்கும் சாரதா முழித்துக் கொண்டு, கீழே ஹாலில் ஏதோ சத்தம் கேட்கிறதென்றாள்.அவளுக்கு இப்படியான பிரமையும் பயமும் அடிக்கடி வரும்.அதனால் நானும் எப்போதும் போல் கண்டுகொள்ளாமல் பேசாமல் படுத்துத் தூங்கு என்று சொல்லிவிட்டு ,தூங்கிப் போய் விட்டேன். இருந்தாலும் கொஞ்ச நேரம் கழித்து மனது சமாதானமாகாமல் சாரதா கீழே போய்ப் பார்த்திருக்கிறாள் போலிருக்கிறது.என்னத்தைச் சொல்ல? அன்றைக்கென்று அவள் பயம் உண்மையாகப் போய் விட்டது.கீழே ஒரு திருடன் இருந்திருக்கிறான்..அவளைப் பார்த்தவுடன் பயத்தில் சுட்டு விட்டான் என்று தோன்றுகிறது.சத்தம் கேட்டு நான் கீழே வரும் போது அவன் தப்பி ஓடிக்கொண்டிருப்பதைத்தான் பார்த்தேன் " என்றார்
"பார்க்க எப்படி இருந்தான்.?" என்றார் ஆனந்த்
"இருட்டில் ஓடும் முதுகுப் புறத்தைத் தான் பார்த்தேன்.அதனால் ஒரு அடையாளமும் சரியாகத் தெரியவில்லை."

ஆனந்த் அறையை நோட்டம் விட்டார்.அறையே தலைகீழாகக் கவிழ்த்துப் போட்டு உலுக்கியது போல் கலைந்து கிடந்தது. சந்தேகத்திற்கு இடமில்லாமல் யாரோ வந்து திருட முற்பட்டது போலான தடையங்கள்.ஆனால் கலைத்துப் போட்டு சுலபமாக யாராலும் இது போல தடையத்தை உருவாக்கவும் முடியும்.

தூண்டித் துருவி விசாரணையும் , தேடலும் தொடர்ந்தாலும் எந்தவிதமான உருப்படியான துப்பும் துலங்கவில்லை. வீட்டிலும் தோட்டத்திலும் பல இடங்களில் தேடியும் சந்தேகப் படும்படியான கைரேகையோ,சாரதாவைக் கொல்லப் பயன் பட்ட துப்பாக்கியோ வேறெந்தத் தடையமோ கூடக் கிடைக்கவில்லை.சொல்லப் போனால் கொலைகாரனைப் பற்றி எந்தச் சின்னச் சுவடும் இல்லை. உண்மையிலேயே ஒரு திருடன் வந்தானா? இல்லை பசவப்பாவே தன் மனைவியைக் கொன்றுவிட்டு நாடகமாடுகிறாரா என்ற கோணத்திலும் விசாரணை சென்றது. ஆனால் அதற்கான எந்த ஆதரமோ முகாந்திரமோ கூடக் கிடைக்கவில்லை.
ஆனந்த் தொடர்ந்து எந்த உணர்ச்சியையும் வெளிக்காட்டாமல்தான் விசாரணையை மேற்கொண்டார். அவரின் இதயத்தின் ஆழத்தில் ஏற்பட்ட வலியையோ ,கோபத்தையோ அதனால் எப்படியும் கொலைகாரனைப் பிடித்தே தீரவேண்டுமென்ற வெறியையோ யாராலும் உணரக்கூட முடியவில்லை.ஆனாலும் அவருடைய விசாரணையின் முடிவில் " திருட வந்த அடையாளம் தெரியாத நபரால் சுடப்பட்டு இறந்தார் ' என்றுதான் கேஸை மூட வேண்டி வந்தது. ஆனந்துக்கு இந்த முடிவில் உடன்பாடில்லையென்றாலும், குற்றவாளியைப் பிடிக்க ஒரு துரும்பு கூடத் தடையமாகக் கிடைக்காத நிலையில் அவரால் வேரொன்றும் செய்ய முடியவில்லை. ஆனால் அவரளவில் இந்த " அடையாளம் தெரியாத நபர் " யாரென்பது பற்றி எந்தச் சந்தேகமும் இல்லை. சாரதாவின் பயந்த முகத்துடன் சேர்த்து ,அந்தக் கொலைகாரனின் வளைந்த மூக்கும் ஆளைக் குத்தும் கழுகுப் பார்வையும் அவர் கனவில் வந்து பல நாள் அவரைத் தூங்க விடாமல் அடித்துக் கொண்டிருந்தது.

சாரதா இறந்த ஒரு மாதத்திலெல்லாம் பசவப்பா வந்த விலைக்கு பங்களாவை விற்று விட்டு போய்விட்டார்.மும்பையில் செட்டிலாகி விட்டார் என்று சிலரும் அமெரிக்கா போய் விட்டாரென்றும் பலவிதமான வதந்திகள்.

இந்த நிகழ்வுகளால்தான் ஆனந்திற்கு இந்த வருடம் வசந்தகாலத்தின் வருகையோ பூக்கள் பூக்கத் தொடங்கியதோ எந்தப் பெரிய மகிழ்ச்சியையும் ஏற்படுத்தவில்லை. ஆனாலும் வழக்கம் போல வசந்தம் அந்த வருடமும் வரத்தான் செய்தது.வழக்கம் போல் பலவிதமான பூக்களின் நறுமணம் காற்றில் கலந்து வந்து நாசியைத் துளைத்தது. ஒரு நாள் ஜீப்பில் போய்க் கொண்டிருந்த ஆனந்த் , முன்பு பசவப்பாவும் சாரதாவும் இருந்த வீட்டின் முன் ஒரு பெண் நிற்பதைப் பார்த்து ஜீப்பை அனிச்சையாக நிறுத்தினார்.

தோட்டத்தில் நின்று கொண்டிருந்த பெண்ணைப் பார்த்து கிட்டத்தட்ட "சாரதா" என்று கூப்பிடப் போனார்.பிறகுதான் அந்தப் பெண்ணிற்கு அதிகம் போனால் பதினெட்டு வயதிற்குள் தான் இருக்கும் என்பதையும் சாரதாவாக இருக்க வாய்ப்பே இல்லை என்பதும் அவர் அறிவுக்கு எட்டியது. புதிதாகக் குடிவந்திருப்பவர்களின் மகளாக இருக்கவேண்டும்.
இதற்குள் அந்தப் பெண் இவரைப் பார்த்து "வணக்கம் அங்கிள் " என்றது.
ஆனந்த் " வணக்கம்,.அப்பா அம்மா வீட்டில் இல்லியா ?" என்றார். அந்தப் பெண் சற்றே கலவரமாகி " இல்லை..வெளியில் போயிருக்காங்க..ஏதேனும் விசாரணையா?..நாங்க இந்த வீட்டுக்கு வந்து கொஞ்ச நாள்தான் ஆகிறது " என்றாள் படபட்ப்புடன்.

ஆனந்த் அவரமாக " இல்லை..இல்லை சாதரணமாகத்தான் கேட்டேன் "என்றார்.
திரும்பவும் தனிச்சையான ஆர்வம் தொற்றிக் கொள்ள அந்தப் பெண் " இந்த வீட்டில் முன்பு நடந்த எல்லா விஷயங்களும் எனக்கும் தெரியும்.இன்னும் அந்தக் கொலைகாரனைப் பிடிக்க முடியவில்லை இல்லையா? " என்றாள்

"ஆமாம்..இன்னும் பிடிக்கவில்லை " என்றார் ஆனந்த் அசுவாரசியமாக
" இது மாதிரி ஒரு அழகான பூந்தோட்டத்தை இதற்கு முன்னால் நான் பார்த்ததே இல்லை .சாரதா மிக மென்மையானவராகவும் , பூக்களை அதிகம் நேசிப்பவராகவும் இருந்திருக்கவேண்டும்.இல்லையா? " என்றாள்.

" நீ சொல்வது முற்றிலும் உண்மை " என்று சொல்லிக் கொண்டே ஆனந்த் ,சாரதாவை முதன் முதலில் சந்தித்த நினைவுகள் தந்த சோகத்துடன் காப்பவுண்ட் ஓரமாக பந்துக் குவியலாகப் பூத்திருந்த நீல நிற ஹைட்ராஞ்சியா மலர்களை வாஞ்சையுடன் தடவினார். பின் ஏதோ நினைவுக்கு வந்தது போல் ,தூக்கி வாரிப் போட்டது போல் "நீல நிறம் " என்றார். திரும்பவும் அந்தப் பூக்களை உற்று நோக்கியவாறு "நீல நிற மலர்கள்.போனமுறை இந்தச் செடிகளில் பின்க் வண்ண மலர்கள் பூத்திருந்தன்.இப்போது நீல நிறத்தில் " என்றார்.
அந்தப் பெண் ஒன்றும் புரியாதவளாக " என்ன சொல்கிறீர்கள் " என்றாள்

உனக்கு ஹைட்ராஞ்சியா மலர்களைப் பற்றித் தெரியுமா ?"ஹைட்ராஞ்சியா மலர்கள் சாதாரணமாக பின்க் நிறத்தில் பூக்கும்.ஆனால் மண்ணில் இரும்புச் சத்து கூடுதலாக இருந்தால் அதன் காரணமாக அதே செடியில் மலர்கள் நீல நிறத்தில் பூக்கத் தொடங்கிவிடும் இதோ இந்த மலர்களைப் போல "

"சரி..இந்த மண்ணில் இரும்புச் சத்து கூடியிருக்கிறது போல் இருக்கிறது"
" ஆமாம்..இந்த செடிகளுக்கு அடியில் உள்ள மண்ணில் போன வருடத்தை விட இந்த வருடம் இரும்புச்சத்து கூடித்தான் இருக்கிறது" என்றார் கண்கள் பளபளப்பாக " ஒரு மண்வெட்டி கிடைக்குமா?" என்றார்.
ஒன்றும் புரியாமல் குழப்பத்துடன் விழித்த அந்தப் பெண் மண்வெட்டியைக் கொண்டு வந்து கொடுத்தாள்.

மண்வெட்டியால் அந்த ஹைட்ராஞ்சியா செடிகளின் அடிப்பாகத்தைத் தோண்டி, அங்கு துருப்பிடித்த நிலையில் இருந்த .32 மிமி ரிவால்வரைக் கண்டெடுத்த போது ஆனந்தின் முகத்தில் பெரிதாக வெற்றி பெற்றுவிட்ட தோரணையெல்லாம் இல்லை.அந்த ரிவால்வர் பசவப்பாவுக்குச் சொந்தமானதென்றும் அதனால்தான் சாரதா கொல்லப்பட்டிருக்கிறார் என்று நிரூபித்து பசவப்பாவை தேடிப்பிடித்து தண்டனை வாங்கிக் கொடுத்த போதும் அவருக்கு பெரியதாக சந்தோஷமெல்லாம் ஒன்றும் இல்லை.

ஆனால் தானும் சாரதாவும் பெரிதும் நேசித்த ஹைட்ராஞ்சியா மலர்கள் வண்ண மாற்றத்தின் மூலம் தன்னுடன் பேசி சாரதாவின் கொலையாளியைக் கண்டு பிடிக்க உதவியது என்ற நினைப்பே அவருக்கு மன நிறைவைக் கொடுத்தது.

Henry Slesar எழுதிய A Cop who loved flowers என்ற கதையின் தழுவல்.

பின்குறிப்பு : கீழே பின்க் மற்றும் நீல ஹைட்ராஞ்சியா மலர்களின் படங்கள் கொடுத்துள்ளேன்.யாராவது இதன் தமிழ் பெயர் தெரிந்தால் சொல்லுங்கள் :)
- ச.சங்கர்



அடுத்த வாரம் மண்டே மர்மங்கள் தொடருமா ?

Read More...

Monday, July 16, 2012

மண்டே மர்மங்கள் (5) - ச.சங்கர்

நாஸ்கா கோடுகள் (The Nazca Lines )
இன்றைய மர்மமும் தென்னமெரிக்க நாடான பெரு பற்றியதுதான். பெருவின் தலைநகர் லிமாவின் தெற்கே 400 கிமி தொலைவில் உள்ள பாலைவனங்கள் உலகின் மிகவும் வினோதமான குறியீடுகளைக் கொண்டுள்ளது. “ஜியோக்ளைப்” என்று கேள்விப்பட்டிருக்கிறீர்களா?பூமியின் பரப்பில் கோடுகள் அமைத்தோ செதுக்கியோ அல்லது கற்களை குவித்தோ, பெயர்த்தோ தோற்றுவிக்கப்பட்ட ஒருவிதமான படம் அல்லது குறியிடுகளுக்கு ”ஜியோக்ளைப்” என்று பெயர். இதற்குத் தமிழ் வார்த்தை தெரிந்தால் யாராவது சொல்லுங்கள். எளிதாகப் புரிவதற்காக ஒரு உதாரணத்திற்கு சொன்னால் திருச்சி மலைக் கோட்டை பாறையில் கல்லால் அல்லது ஆணியால் தேய்த்துத் தேய்த்து மிகப் பெரிதாக “ I Love Divya" என்று பொரித்து வைக்கிறார்களே அதுவும் ஒரு விதமான ஜியோக்ளைப்தான் :)



உலகெங்கிலும் நிறைய இடங்களில் ஜியோக்ளைப்கள் கண்டு பிடிக்கப் பட்டுள்ளன. பொதுவாக பாறைகளை சீராக வைத்து அல்லது அகற்றி, குழிகள் தோண்டி அமைக்கப்பட்டவை என்று.இவற்றுள் பெருவில் நாஸ்கா என்ற இடத்தில் ”நாஸ்கா கோடுகள்” என்றழைக்கப்படும் ஜியோக்ளைப்தான் அல்டிமேட் என்று சொன்னால் மிகையில்லை.அந்த நாஸ்கா கோடுகளில் அப்படி என்ன அதிசயம் என்கிறீர்களா?ஏதோ ராட்சதர்களால் பூமியில் கிழிக்கப்பட்ட கோடுகள் போல குறுக்கும் நெடுக்குமாக , ஒன்றின் மீது ஒன்றாக என்று ஏகப்பட்ட கோடுகள் சேர்ந்து “நாஸ்கா கோடுகள் “ என்று அழைக்கப் படுகிறது.பல விதமான கணித வடிவங்கள், விலங்குகள்,பறவைகள்,பூக்கள் என்று 15000 க்கும் மேற்பட்ட உருவங்கள் வரையப்பட்டிருக்கின்றன.
சுமார் 1 அடி ஆழக் கோடுகள். 450 சதுர கிலோமீட்டர் பரப்பளவுக்கு இந்தக் கோடுகள் விரிகின்றன என்றால் அதன் ராட்சதத் தன்மையைக் கற்பனை செய்து கொள்ளுங்கள்.இங்கு வரையப்பட்டுள்ள உருவங்களில் சிலந்தி, நாய், தேன்சிட்டு, குரங்கு,திமிங்கலம்,பெலிக்கன் பறவை என எழுபதிற்கும் மேற்பட்டவை அடையாளம் காணப்பட்டுள்ளன,எல்லாமே ராட்சத உருவங்கள். இருப்பதிலேயே மிகப் பெரிய பெலிகன் பறவை உருவத்தின் நீளம் 800 அடிக்கும் மேல். உருவங்கள் தவிர காணப்படும் குறுக்கு நெடுக்குக் கோடுகளில் சில, பல கிலோ மீட்டர் நீளம் கொண்டவை.
குரங்கு
நாய்
தேன் சிட்டின் உருவம்(Humming Bird)
இந்த இடத்தில் உள்ள மண் மற்றும் கற்கள் இரும்புத்தாது அதிகம் உள்ள மண்ணுடன் கலந்தது.இது தட்பவெப்பத்தால் நாள்பட நாள்பட ஒரு கரு நிறத்திற்கு மாறி விடுகிறது.மேற்புறமுள்ள மண் கல்லை அப்புறப் படுத்தினால் உள்ளே வெளிரிய நிறத்திலுள்ள அடி மண் புலப்படும்.இப்படியாக மேற்பரப்பிலுள்ள மண் கற்களை ஒரு வடிவத்திற்கேற்ப அப்புறப்படுத்தினால் வானத்திலிருந்து பார்க்கும் போது கருப்புத் துணியில் வெளிர் நிறத்தில் வரையப்பட்ட சித்திரம் போல் தோற்றமளிக்கிறது. சொல்லப் போனால் முதலில் ஆகாய விமானத்தில் பயணம் செய்யும் போதுதான் இந்த நாஸ்கா கோடுகளையும் அதில் புலப்படும் உருவங்களையும் மக்கள் பார்க்க ஆரம்பித்தார்கள்.இந்தப் பகுதியில் மழையளவு உலகிலேயே மிகக் குறைவு என்பதாலும் பூமியிலுள்ல மண்ணைத் தூற்றி வாரும் அளவுக்கு பெரும் காற்று வீசாததும் இந்தக் கோடுகள் இன்னும் மறையாமல் , அழியாமல், மண்ணில் புதையாமல் கண்ணுக்குப் புலப்படக் காரணம்.
வேற்று கிரக வாசிகளால் வரையப்பட்டவை, வேற்று கிரக விண்கலங்கள் தரையிரங்க வரையப்பட்ட விமான ஓடுதளம், பாலைவனத்தில் நீர் இருக்கும் இடங்களைச் சுட்டுவதற்காக குறிக்கப் பட்ட வரைபடங்கள், மிகப் பெரிய வானவியல் நாள்காட்டி ,அந்தக் கால நாஸ்காவில் வாழ்ந்த மக்களின் கலாசாரமற்றும் சடங்குகளில் பயன்படுத்தப் பட்டு வந்த உருவங்கள் என ஏகப்பட்ட ஊகங்களும் விளக்கங்களும்.
நவீன தொல்பொருள் ஆராய்ச்சியாளர்களின் ஆய்வுகளின் படி கிமு 200 ஆண்டு முதல் கிபி 700 ஆம் ஆண்டு வரை கலாச்சாரத் தொடர்சியுடன் வரையப்பட்டுள்ள இந்த நாஸ்கா கோடுகள் அந்த பகுதியில் வாழ்ந்து மறைந்த நாஸ்கா மக்களின் கலாச்சாரத்துடன் நெருங்கிய தொடர்பு கொண்டு விளங்கியிருக்கிறது என்பதற்கான சான்றுகள் புலனாகியுள்ளன. இருந்தும் இந்தக் கோடுகளை/ உருவங்களைத் தோற்றுவிக்கத் தேவைப்படும் ஆட்கள் காலம்,மனித உழைப்பு ஆகியவற்றை நினைக்கும் போது ஏதோ வாழ்வு,நம்பிக்கை அல்லது கலாசாரத்தை ஒட்டிய நிகழ்வுக்காக அல்லது அதைக் குறிக்கவே அரும்பாடு பட்டு இந்தக் கோட்டுருவங்களை உருவாக்கியுள்ளனர் என்பது மட்டும் புலனாகிறது. ஆனால் என்ன காரணம் என்பதை வெளிக்காட்டாமல் ஒரு மிகப் பெரிய புதிர் சித்திரம் போல பெருவின் விரிந்து கிடக்கும் நாஸ்கா கோடுகள் இன்னும் அவிழ்க்கப்படாத மர்மத்தின் மெளன சாட்சியாக விளங்கிக் கொண்டிருக்கிறது.

சிலந்தி உருவம் கண்டுபிடிக்க முடிகிறதா பாருங்கள்
மர்மங்கள் தொடரும்
அன்புடன்...ச.சங்கர்
கீழே உள்ள படத்தில் என்ன தெரிகிறது ? :-)



Read More...

Monday, July 09, 2012

மண்டே மர்மங்கள் (4) - ச.சங்கர்

இன்கா தங்கம் (Inca Gold)

ஆதிகாலத்திலிருந்தே மனிதனுக்கு தங்கம் என்ற உலோகத்தின் மீதிருந்த மோகம் அலாதியானதுதான்.அதுவும் ஸ்பானியர்களுக்கு வெறி என்றே சொல்லலாம். 16 ஆம் நூற்றாண்டுகளில் ஸ்பானியர்கள் தென்னமெரிக்க நாடுகளுக்குச் சென்றதும்,அங்குள்ள பழங்குடியினர் மீது தாக்குதல்கள் நடத்தி வெறியாட்டம் போட்டதும் நாடுகளைப் பிடிப்பதற்காக என்பதை விட, அங்கே அளவுக்கதிகமாகக் கொட்டிக்கிடப்பதாக நம்பிய தங்கத்திற்காகவும்தான்.அப்படி அவர்களால் ஆக்ரமிக்கப் பட்டதுதான் பெரு நாட்டின் இன்கா மக்களும் அதன் அரசும் .ஸ்பானியர்கள் சூறையாடியது போக மிகப் பெரும் பகுதி தங்கம் எங்கோ மறைத்து வைக்கப்பட்டிருக்கிறது என்னும் கர்ண பரம்பரைக்கதைதான் இந்த இன்கா தங்கம் பற்றிய மர்ம முடிச்சின் அஸ்திவாரம்.

இன்கா நாகரீகம் பெரு நாட்டின் ஆண்டஸ் மலைப் பகுதியில் 13 ஆம் நூற்றாண்டுகளில் எழுச்சியுற்றது. 16 ஆம் நூற்றாண்டில் ஸ்பானியர்களால் கைப்பற்றப் படும் வரை , இன்கா மக்கள் இந்தப் பகுதியில், மற்றும் சுற்றியிருந்த பல தென்னமெரிக்க நிலப்பரப்புகளையும் ஆட்சி செய்து வந்தனர்.பொதுவாகவே இன்கா மக்களிடம் நிறைய தங்கம் புழக்கத்தில் இருந்ததென்று நம்பப்படுகிறது. தென் ஆப்பிரிக்காவின் மிகப் பெரிய தங்கச்சுரங்கங்கள் இரண்டும் இன்கா ஆட்சிக்குட்பட்ட பகுதியிலேயே இருந்ததும் இந்த நம்பிக்கைக்கு வலுச்சேர்பதாய் அமைந்து விட்டது.இப்படி ஏராளமாக இவர்களிடம் இருந்ததாக நம்பப்படும் தங்க பொக்கிஷங்களில் ஹுஅஸ்கர் சங்கிலியும் ஒன்று.கிட்டத்தட்ட 750 அடி நீளமுள்ள கனமான ஒரு சங்கிலி . சங்கிலியின் மேற்புறம் முழுவதும் பாம்பின் செதில்கள் போல தங்கத் தகடுகள் பதிக்கப் பட்டது.சுமார் 200 பேர் தூக்கக் கூடிய எடையுள்ளதென்றால் அதன் எடையை அனுமானித்துக் கொள்ளுங்கள். இன்கா மக்களின் வழிபாட்டு வைபவங்களின் போது 200 பேர் இந்தச் சங்கிலியைத் தூக்கிக் கொண்டு நடனமாடுவது ஒரு முக்கிய நிகழ்சியாக இருந்ததாம்.அப்படி ஆடும் போது இந்தச் சங்கிலியில் பதித்துள்ள தங்கச் செதில்களில் சூரிய ஒளி பட்டு கண்கள் கூச அந்தப் பிரதேசமே தங்க ஒளியில் தகதகக்குமாம்.
இந்த சங்கிலியை அதஹூல்பா என்கிற இன்கா மன்னனின் அப்பா தனது மூத்த மகனும் அரச வாரிசுமான ஹுஅஸ்கர் பிறந்ததை முன்னிட்டு செய்ததால் இது ஹுஅஸ்கர் சங்கிலி என்றே அழைக்கப் படுகிறது.


அதஹூல்பா(படம்) ஆட்சிக்கு வரும் போது தன் அண்ணன் ஹுஅஸ்கரைக் கொன்று விட்டான் என்பது தனிக்கதை. இந்த அதஹுல்பா காலத்தில், ஸ்பானியர்கள் ஃப்ரான்ஸிஸ்கோ பிஸரோ என்ற தளபதி தலைமையில் பெரு நட்டில் நுழைந்து கைப்பற்றத் தொடங்கினர்.போரில் அவர்கள் அதஹுல்பாவை சிறைப் பிடித்தவுடன்(படம்) மன்னன் அதஹுல்பா தன் விடுதலைக்காக தருவதாக பேரம் பேசியது என்ன தெரியுமா?
தன்னை சிறை வைத்திருந்த அறையைத் தங்கத்தால் நிரப்புவதாக வாக்களித்தானாம். முதலில் இந்த பேரத்தை பிஸரோ ஏற்றுக் கொண்டான். உடனே நாடெங்கிலுமிருந்து தங்கம் வந்து குவியத்தொடங்கியது.மக்கள் தங்கள் மன்னன் அதஹூல்பாவைக் காப்பாற்ற தங்கத்தை லாமா வண்டிகளில் (நம்மூர் மாட்டு வண்டி மாதிரி அந்த ஊரில் லாமா வண்டி)ஏற்றி அனுப்பத் தொடங்கினர். ஆனால் தங்கம் வரத் தொடங்கிய சிறிது காலத்திலேயே பிஸரோ மனதை மாற்றிக் கொண்டு , அதஹூல்பாவைக் கொலை செய்து விட்டான். அதஹுல்பா கொல்லப்பட்ட செய்தி பரவியதும், இன்கா படை வீரர்கள் தாங்கள் எடுத்து வந்து கொண்டிருந்த தங்கக் குவியல்களை ஆங்காங்கே ஆண்டஸ் மலை ஏரிகளில் எறிந்தும்,மலைக் குகைகளில் மறைத்தும் வைத்து விட்டனர் என்றும் அதில் இந்த ஹுஅஸ்கர் சங்கிலியும் இருந்ததென்றும் கதைகள் உலவுகின்றன.
இது நடந்து 50 வருடங்களுக்குப் பிறகு பெரு நாட்டிற்கு வந்த வால்வோர்ட் என்ற ஸ்பானியருக்கு அவரது பெரு நாட்டு சிவப்பிந்திய மனைவியின் குடும்பம் மூலமாக அந்தத் தங்கத்தின் இருப்பிடம் தெரிந்ததென்றும் அதன் மூலம் வால்வோர்ட் பெரும் பணக்காரனாகி விட்டதோடல்லாமல் அந்தப் புதையலுக்குப் போகும் வழித்தடங்களை விவரமாகக் குறித்து வைத்து விட்டுச் செத்தார் என்று ஒரு தோராயமான வால்வோர்ட் குறிப்பும் கிடைத்தது. போதாதா புதையல் வேட்டை ரசிகர்களுக்கு? இன்கா புதையலைத் தேடி ஆண்டஸ் மலைகளில் சுற்ற ஆரம்பித்து விட்டார்கள்.
1850 களில் சற்றே ஓய்ந்த இந்தத் தேடுதல் வேட்டை, ரிச்சார்ட் ஸ்புரூஸ் என்கிற ஆங்கில தாவரவியலாளர் மலேரியா நோய்த் தடுப்பிற்கான கொயினா தயாரிக்கப் பயன்படும் சின்கோனா மரத்தைத் தேடி ஆண்டஸ் காடுகளில் அலைந்த போது தனக்கு வால்வோர்டின் குறிப்பையொட்டி அடனாசியோ குஸ்மான் என்பவர் தயாரித்த வரைபடம் கிடைத்தது என்று சொன்ன பின்னர் திரும்பவும் சூடு பிடித்தது. இவரது குறிப்பைத் தொடர்ந்து பார்த் ப்ளேக் என்ற புதையல் ஆர்வலர் 1886 ல் புதையலைத் தேடப் புறப்பட்டார்.அவர்தான் புதையலைக் கடைசியாகக் கண்ணால் பார்த்தவர் என்று நம்பப் படுகிறது. அவர் புதையலிலிருந்து கண்டெடுத்ததாக முழுவதும் மரகதக் கற்கள் பதிக்கப் பட்ட தங்கக்குவளை (படம்) பற்றி தன் குறிப்புகளில் எழுதியிருக்கிறார்.
மேலும் "மிகச்சிறந்த பொற்கொல்லர்களின் கைவண்ணத்தினாலான இன்கா மற்றும் அதற்கு முந்தைய நாகரீக காலத்திற்கான தங்க,வெள்ளி பாத்திரங்களும்,ஆபரணங்களும் ஆயிரக்கணக்கில் குவிந்து கிடக்கின்றன.இவற்றை என்னால் தனியாக அப்புறப் படுத்த முடியாது " என எழுதி வைத்திருக்கிறார்.முழு அளவில் மனித உருவங்கள்,பறவைகள், மிருகங்கள் ,பூக்கள் என்று அங்கிருந்த பொருட்களைப் பற்றி அவர் குறிப்பெழுதி யிருக்கிறார்.தன்னால் முடிந்த அளவு புதையலை எடுத்துக் கொண்டு கிளப்பியதாக நம்பப்படும் அவர் போன இடமே தெரியவில்லை.நியூயார்க் சென்ற பிறகு போதிய ஆட்களையும் உபகரணங்களையும் எடுத்துக் கொண்டு அந்தப் புதையலை எடுக்க வரலாம் என்று கப்பலில் திரும்பும் போது வழியில் கடலில் விழுந்து விட்டார் என்றும், அவரிடம் இருந்த புதையல் பொருட்களுக்காக கடலில் தள்ளி கொல்லப்பட்டார் என்றும் ஏகப்பட்ட வதந்திகள். புதையலைத் தேடி, ப்ளேக் போன பாதையைத் தொடர முயன்று ஆண்டஸ் மலைத் தொடரில் நுழைந்த பலரும் உயிரோடு திரும்பவில்லை.
இப்படியாகப் பார்த்தவர்கள் ,பார்க்காதவர்கள்,காதால் கேட்டவர்கள் என்று அத்தனை கதைகளையும் சுமந்து கொண்டு தொடர்ந்து கொண்டிருக்கிறது இன்கா தங்கத்தின் மர்மம்.அதஹூல்பா மன்னன் பிடிபட்டதும், காப்பாற்ற நாடெங்கிருந்தும் தங்கம் வந்ததும், எல்லா தங்கமும் வந்து சேரும் முன்னரே அதஹூல்பா கொல்லப்பட்டதும் உண்மை. ஏனெனில் இதெல்லாமே ஸ்பானியர்களால் ஆவணப் படுத்தப் பட்டிருக்கிறது.ஆனால் அதன் பின் மீதமிருந்த தங்கக் குவியல் என்று ஒன்று உண்டா என்ற மர்மத்திற்கு இன்று வரை விடையில்லை.அப்படியே புதையல் ஆண்டஸ் மலையில் இருந்தாலும் விரிந்து பரந்த ஆண்டஸின், அதுவும் பல முறை நில நடுக்கத்திற்கும் நிலச் சரிவுகளுக்கும் உள்ளானதும்,அடர்ந்த காடுகளை உள்ளடக்கியதுமான லாங்கனேடஸ் மலைத் தொடரில் இன்கா தங்கப் புதையலைத் தேடுவது வைக்கோல் போரின் நடுவில் ஊசியைத் தேடுவதற்கு ஒப்பானது என்றே சொல்லலாம்.
எது எப்படியோ இதை வைத்து நாவலாசிரியர் க்ளைவ் கஸ்லரும் INCA GOLD என்றோர் புதையல் வேட்டை நாவலை எழுதி கல்லா கட்டிவிட்டார்.அவர் எழுதிய அட்வென்சர் நாவல்களில் இது ஒரு விறுவிறுப்பான நாவல் என்று கூடச் சொல்லலாம். சந்தர்ப்பம் கிடைத்தால் படித்துப் பாருங்கள்.
பேராசை,படையெடுப்பு,கொலைகள்,மர்மங்கள் என அனைத்தும் அடங்கிய இன்கா தங்கப் புதையல் உண்மையா, இன்னும் ஈகுவெடாரின் பனிப்புகை சூழ்ந்த ஆன்டஸ் மலைக் கூட்டத்தில் எங்கோ ஒளிந்து கொண்டிருக்கிறதா,வால்வோர்டின் புதையலுக்கான பாதைக் குறிப்புகள் உண்மையா என்ற கேள்விகளுக்கு விடையில்லாமல் இன்னும் தொடர்ந்து அனைவரையும் இழுக்கிறது இன்கா தங்கம் என்னும் மாயமான் வேட்டை.

மர்மங்கள் தொடரும்.
அன்புடன் ச.சங்கர்

மஞ்சள் கலரில் இருக்கும் தங்கம் பற்றி இந்த வாரம் நிறைய இருப்பதால் மஞ்சள் கமெண்ட் இந்த வாரம் கிடையாது :-)

Read More...

Monday, July 02, 2012

மண்டே மர்மங்கள் (3) - ச.சங்கர்

கடலுக்குள் “அட்லான்டிஸ்”

அட்லான்டிஸ் என்ற மர்மத்திற்கு பிள்ளையார் சுழி போட்டவர் கிரேக்க அறிஞர் ப்ளாட்டோதான்(இவர் தத்துவ மேதை சாக்ரடிஸின் சீடர்).அட்லான்டிஸ் என்பது மிக முன்னேறிய ஒரு தீவு நாகரீகத்தைப் பற்றிய கர்ண பரம்பரைக் கதை. இதைப் பற்றி ப்ளாட்டோ தன்னுடைய “ தைமியஸ் மற்றும் க்ரிடியஸ் ” என்ற உரையாடல் தொகுப்புகளில் குறிப்பிட்டுள்ளார். அந்த உரையாடல்களில் வரும் கதாபாத்திரங்கள் , அட்லான்டிஸ் பற்றியும், அது (ப்ளாட்டோவின் காலத்துக்கு) 9000 ஆயிரம் வருடங்களுக்கு முன்னால் பூகம்பத்தினாலோ சுனாமியினாலோ அழிந்து விட்டது என்று குறிப்பிடுகின்றன.கதையில் இந்தத் தீவு ஹெர்குலஸ் தூண்களுக்கு வெளியே எங்கோ ( இன்றைய கிப்ரால்டர் ஜலசந்தியில் ) இருப்பதாக சொல்லப்பட்டிருக்கிறது.



அட்லாண்டிஸ் பற்றிக் கிடைத்த எழுதப்பட்ட ஆவணக் குறிப்பு என்று பார்த்தால் அது. ப்ளாட்டோவின் தைமியஸ் மற்றும் க்ரிடியஸ் உரையாடல்கள் மட்டுமே.ஆனால் இது பற்றி மனிதர் கொஞ்சம் விலாவாரியாகவே எழுதி வைத்து விட்டுப் போய்விட்டார்.இவர் எழுதிய இந்த உரையாடல் சாக்ரடிஸ்,ஹெர்மோகிரெடஸ்,தைமியஸ் மற்றும் க்ரிடியஸ்ஸுக்கு நடுவில் நடக்கிறது. சாக்ரடிஸ் முன்னதாக சிறந்த சமூக அமைப்புகள் (ideal societies) பற்றிப் பேசியதற்கு பதிலளிக்கும் போது தைமியஸும் க்ரிடியஸும் அப்படிப் பட்ட சமூகத்தின் ஒரு உண்மையான கதையை சாக்ரடிசுக்கு கூற முன்வருகின்றனர். கதை 9000 வருடங்களுக்கு முன்னால் ஏதனியர்களுக்கும் அட்லாண்டியர்களுக்கும் இடையேயான முரண்பாடுகள்,போர் பற்றியது.ஏதனியர்கள் மறந்து போன இந்த அட்லாண்டிஸ் பற்றிய வரலாறு சோலோன் (ஏதனியப் பயணி மற்றும் கவிஞர்) என்பவருக்கு எகிப்திய குருமார்களால் சொல்லப்பட்டது. சோலான் இதை ட்ரோபிடஸ் என்ற தன் சொந்தக்காரருக்குச் சொல்லுகிறார். இந்த ட்ரோபிடஸின் மகன் க்ரிடியஸ். இந்தக் க்ரிடியஸின் பேரனின் பேரும் க்ரிடியஸ்தான்(ப்ளாட்டோவின் கொள்ளுத்தாத்தா).இந்தப் பேரன் க்ரிடியஸ்தான் தன் தாத்தா க்ரிடியஸ் தனக்கு அட்லான்டிஸ் பற்றி சொன்னதாக ப்ளாட்டோவின் உரையாடலில் (சாக்ரடிஸுக்கு) இந்தக் கதையைச் சொல்லும் பேர்வழி.
தைமியஸ் நீங்கலாக இந்த உரையாடலில் குறிப்பிடப் படும் அனைவரும் புராதன கிரேக்கத்தில் இருந்ததற்கான சரித்திரக் குறிப்புக்களும் ஆவணங்களும் இருந்திருக்கின்றன.மேலும் பல நூல்களில் இவர்களது வாழ்வும் செயல்களும் குறிப்பிடப்பட்டுள்ளன.இதனால் இதை முழுவதும் கட்டுக்கதை என்றும் புறந்தள்ள முடியவில்லை.
கதையில் சொல்லப்பட்டபடி ,அட்லான்டிஸின் தலைநகர் மிகச்சிறந்த கட்டிடக்கலை மற்றும் பொறியியலுக்கு உதாரணம். பல அடுக்கு வளையமாக கட்டப்பட்ட மாளிகைகள் , பல கால்வாய்கள், அரங்கங்கள் என அனைத்தும் உண்டு அட்லாண்டிஸில் . நடுவில் உயர்ந்த மலையில் அமைக்கப்பட்டிருந்த பிரும்மாண்டமான கோவிலில் கடல் கடவுள் பொசைடான் இறக்கைகளுள்ள ஆறு குதிரைகள் கொண்ட ரதத்தைச் செலுத்துவது போன்ற பெரிய சிலை தங்கத்தில் வடிக்கப்பட்டிருந்தது. இங்கு வாழ்ந்த மக்கள் பெண்களை முதன்மைப் படுத்திய மிகவும் முன்னேறிய சமுதாயமாக இருந்தனர். இப்படிப் போகிறது (பிளாடோவின்) வருணனை. இதைத் தவிர இங்கு வாழ்ந்த மக்கள், பழக்க வழக்கங்கள், ஆயுதங்கள், உலோகங்கள், சீதோஷண நிலை இப்படி A to Z எல்லாவற்றையும் பற்றி ப்ளாட்டோ விலாவாரியாக எழுதியிருக்கிறார். எவ்வளவு சிறப்பான ஒரு சமூகம் என்றால் உடோபியன் என்ற வார்த்தையே அட்லான்டிஸிலிருந்து மருவி வந்ததாகச் சொல்கிறார்கள்-அவ்வளவு உன்னதமான சமுதாயமாகச் சித்திரிக்கப்பட்டிருந்தது அட்லாண்டிஸ் ஒவ்வொரு விடயத்திலும்.
கதையாடலைப் பார்த்தால் இப்படியும் ஒரு சமுதாயம் இருந்திருக்குமா என்ற வியப்பும் அது எங்கிருந்தது, ஏன் மறைந்த்து,எப்படி மறைந்தது என்ற தேடல்கள் நூற்றுக்கணக்கான வருடங்களாக மக்களைத் தலையைப் பிய்த்துக் கொள்ள வைத்து விட்டது.
ஆனால் பலர் இதனை ஒரு கட்டுக்கதை என்றும் ப்ளாட்டோ தன் உரையாடல்களை சுவாரசியமாக்குவதற்காக உருவகப் படுத்தியதென்று சொல்கிறார்கள். மறு தரப்போ சீரியசாக அப்படி ஒரு இடம் இருந்ததென நம்புகிறது. கிட்டத்தட்ட நூறு இடங்கள் வரை புராதன அட்லாண்டிஸ் இருந்த இடமாக நம்பப்பட்டு சொல்லப்பட்டுள்ளன. இதில் ஒரு சிலவே வல்லுனர்களும் அகழ்வாராய்சியாளர்களும் ஆதாரக் குறிப்புகளுடன் இவையாக இருக்கலாம் என்று சொல்லும் இடங்கள். மற்றவை கிட்டத்தட்ட காலையில் எழுந்தவுடன் ”கனவில்” அட்லான்டிஸ் இருந்த இடம் தெரிந்தது டைப். கண்டங்கள் இடம் பெயர்ந்து நகரும் தன்மைகள்(continental drift) பற்றி மேலும் பல தெளிவுகள் ஏற்பட்ட 1950 களில் அட்லான்டிஸ்-மறைந்த கண்டம் என்பது தவறானது என்றே கிட்த்தட்ட நிருபணமாகியுள்ளது.


பதினேழாம் நூற்றாண்டின் அறிஞர் அதனாசியஸ் கிர்ச்செர் அட்லாண்டிக் கடல் நடுவில் அட்லாண்டிஸ் என்று சுட்டிக்காட்டி வரைந்த வரைபடம்.

அட்லான்டிசின் புராண கதைச்சுருக்கம். கிரேக்கக் கடல் கடவுளான பொசைடான் ஒரு தீவில் க்ளெய்டோ என்ற அழகான ஒரு பெண்ணைப் பார்த்து மையல் கொள்கிறார். இருவருக்கும் பத்து குழந்தைகள் பிறக்கின்றன. தலைச்சன் குழந்தை பெயர் அட்லஸ். பொசைடான் ஒரு சந்தேகப் பேர்வழி. க்ளெய்டோவைக் கூட நம்பாமல் அந்த இடத்தில் யாரும் நெருங்க முடியாதபடிக்கு கடல் அகழிகள் அமைத்து ஒரு தீவு நகரமாக்கி விடுகிறார்.அதுவே அட்லஸின் பெயரால் அட்லாண்டிசாக ஆகி அட்லஸ் முதல் அனைவராலும் ஆளப் பட்டது. இது கடல் கன்னிகளால் காக்கப்படும் நகரமாக இருந்தது. அங்குள்ள உயர்ந்த மலையில் அமைக்கப்பட்டிருந்த பிரும்மாண்டமான கடல் கடவுள் பொசைடான் கோவில் ஒரு உலக அதிசயம். மேகங்களே கோவிலுக்குள் உலவும் அளவு பிரும்மாண்டம். இப்படிப் போகிறது அட்லான்டிஸ் புராணக் கதை
இன்றைய தேதி வரை அட்லாண்டிஸ் பற்றி ஆயிரக் கணக்கில் ஆய்வுகள் , தேடல்கள், புத்தகங்கள், திரைப்படங்கள், கதைகள் என்று வந்த வண்ணம் இருக்கிறது கிரீசின் அருகில் ,ஸ்பெயினின் அருகில் ,இத்தாலியின் அருகில் என்று எத்தனையோ இடங்களில் அட்லான்டிசைக் கண்டு பிடித்து விட்டதாக செய்திகள் வந்த வண்ணம் இருக்கின்றன.ஆராய்ச்சிகளும் தொடர்ந்து கொண்டிருக்கின்றன. ஆனால் இந்த பூமியில் இருந்ததா, இல்லை அதீத மனித கற்பனையின் வெளிப்பாடா என்ற புதிர்களை உள்ளடக்கியவாறு இன்னும் இந்த உலகில் மர்மமாகவே தொடர்ந்து கொண்டிருக்கிறது அட்லான்டிஸ் என்னும் மாயாலோகம்.

- ச.சங்கர்

மண்டே மர்மங்கள் தொடரும்....

தமிழ் நாடா இருந்தா நில அபகரிப்பு புகார் போட்டு உள்ளே தள்ளியிருக்கலாம்!

Read More...

Monday, June 25, 2012

மண்டே மர்மங்கள் (2) - ச.சங்கர்

டூரின் சவப்போர்வை (The Shroud of Turin )
இந்த உலகத்தில் ஒரு துணி இவ்வளவு சர்ச்சைகளுக்கு உள்ளாகியிருக்குமென்றால் அது இத்தாலியில் டூரின் நகரில் புனித ஜான் தேவாலயத்தில் வைக்கப்பட்டிருக்கும் இறந்தவர்களது உடலை அடக்கம் செய்யும் போது உடலைச் சுற்றப் பயன்படுத்தப் படும் ஒரு பழைய சவப்போர்வைதான். 1578 ஆம் ஆண்டிலிருந்து அதாவது கடந்த 450 ஆண்டுகளாக ஒரு சிவப்பு பட்டுத்துணியில் சுற்றப்பட்டு வெள்ளிப் பேழையில் வைக்கப் பட்டிருக்கிறது.

கிட்டத்தட்ட 14 அடி நீளமும் 3.5 அடி அகலமும் கொண்ட அந்தத் துணியில் அப்படி என்ன அதிசயம் என்கிறீர்களா? அதில் ஒரு மனிதனின் முன்பக்க, பின்பக்க உருவம் பதிந்திருக்கிறது.
நீளமான ஒரு துணியில், ஒரு உடலை நீட்டுவாக்கில் படுக்க வைத்து அதே துணியின் மீதப் பகுதியால் அந்த உடம்பைத் தலையிலிருந்து போர்த்தினால் அந்த உருவத்தின் பதிவு அந்தத் துணியில் ஏற்பட்டால் எப்படி இருக்குமோ அது மாதிரியான தோற்றம் பதிந்திருக்கிறது.



இதை வெறும் கண்களால் பார்க்கும் போது ஃபோட்டோ நெகடிவ் பிரதியில் எப்படித் தெரியுமோ அப்படி தெரிகிறது. ஃபோட்டோ எடுத்து அதன் நெகடிவில் பார்த்தால் நிழல் போல உருவம் துல்லியமாகத் தெரிகிறது.

இந்தத் துணிக்கும் அதில் பதிந்திருக்கும் உருவத்துக்கும் மட்டும் ஏன் இவ்வளவு முக்கியத்துவம் என்று இந்நேரம் ஊகித்திருப்பீர்களே!!! ஆம்.. ஏசுநாதர் சிலுவையில் அறைந்து கொல்லப்பட்ட பிறகு அவரது உடலை மூடப் பயன்பட்ட துணி என்றும் அதில் பதிந்துள்ள உருவம் சாட்சாத் ஏசுவினுடையதுதான் எனவும் நம்பப்படுவதால் தான் அதற்கு இத்தனை மவுசும் அது உண்மையா இல்லையா என்று தொடரும் மர்மமும்.
சரி..அது எப்படி அந்த உருவம் ஏசுவினுடையதுதான் என நம்ப என்ன ஆதாரம்? அந்த உடல் அந்தத் துணியில் சுற்றப்படுவதற்கு முன் மிகவும் சித்திரவதைக்குள்ளான அடையாளங்களும், ரத்த தடயங்களும் அதில் பதிந்துள்ள மாதிரி காட்சியளிக்கிறது. ஏசுவை யூதர்கள் சிலுவையில் அறைந்த போது என்னென்ன கொடுமைகள் செய்தார்களென்று படித்த அல்லது சினிமாவில் பார்த்த காட்சியை நினைவுக்குக் கொண்டு வந்து பாருங்கள். அவருடைய தலையில் முள் கிரீடம் வைத்தால் எப்படித் தலையில் காயம் உண்டாகுமோ அப்படிப்பட்ட காயத்தினால் ஆனது போல ரத்த அடையாளங்கள் அந்தத் துணியில் பதிந்துள்ளன. அதுமட்டுமில்லாமல் ஏசுவை சிலுவையில் அறைந்த போது ஆணியால் உண்டான ஓட்டைகள் காலிலும், இரண்டு கை மணிக்கட்டுக்களிலும் (பொதுவாக நம்பப்படுவது போல் சிலுவையில் அறையப்படும் போது உள்ளங்கையில் ஆணிகள் அடிக்கப்படுவதில்லையாம், ஏனென்றால் சிலுவையைத் தூக்கி நிறுத்தும் போது உடலின் பாரம் தாங்காமல் உள்ளங்கை சதையை பிய்த்துக் கொண்டு உருவம் கீழே விழுந்து விடுமாம்.அதனால் ரோமானிய காலத்தில் மணிக்கட்டில்தான் ஆணி அடிப்பார்களாம் ) இருந்ததும் அதிலிருந்து வெளிவந்த ரத்தச் சாயலும் கூட இந்தத் துணி உருவத்தில் பதிந்துள்ளதாம். இதையெல்லாம் வைத்து மத நம்பிக்கையாளர்கள் இது ஏசு நாதர் உடலை மூட பயன்பட்ட சவத்துணி என்றும் அதில் பதிந்துள்ள உருவம் அவருடையதுதான் என திடமாக நம்புகிறார்கள்.



மறுதரப்போ இது மத நம்பிக்கையைத் தூண்ட ஏற்படுத்தப்பட்ட ஒரு நாடகம் என்று ஆணித்தரமாக வாதிடுகிறார்கள்.இதற்கு இவர்கள் தரப்பில் எடுத்துக் காட்டப்படும் ஆதாரங்களையும் அதற்கு நம்பிக்கையாளர்கள் தரப்பில் சொல்லும் விளக்கங்களையும் (அடைப்புக் குறிக்குள்) பார்க்கலாம். 1) இது ஏசுவினுடையதுதான் என்றால் அவர் இறந்த 1500 ஆண்டுகளாக எங்கிருந்தது? இது பற்றி ஏன் பைபிளிலோ வேறெதிலுமோ எந்தக் குறிப்பும் இல்லை.( 9 மற்றும் 10ஆம் நூற்றாண்டுகளில் பைசாந்தைன், கான்ஸ்டான்டிநோபில் போன்ற இடங்களில் சில குறிப்புகள் உள்ளன. மேலும் கடவுளரின் பொருட்கள் அனைத்தும் எல்லா புராணங்களிலும் மனித ரூபங்களாக சித்தரிக்கப் படுவது போல் (புரிதலுக்காக என்னுடைய லோக்கல் உதாரணம்- விஷ்ணு பகவான் கையிலுள்ள சக்கராயுதம் சக்கரத்தாழ்வார் எனும் ரூபமாக வழிபடப்படுவது போல்) இந்தத் துணியும் வெள்ளை ஏஞ்சல் என குறிக்கப்பட்டுள்ளது என்றும் மேரி மக்டலீன் ஏசு உயிர்தெழுந்த அன்று பார்த்ததாகக் குறிப்பிடப்பட்டுள்ள வெள்ளை ஏஞ்சல், அவர் இந்தத் துணியை/அதில் ஏசு உருவத்தை பார்த்ததைக் குறிப்பதே என்கிறார்கள்)

2) 1998 ஆம் வருடம் உலகின் 3 வெவ்வேறு விஞ்ஞானக் கூடங்களால் கார்பன் டேட்டிங் முறைப்படி இந்தத் துணியின் காலம் ஆராயப்பட, அந்த மூன்று முடிவுகளுமே இந்தத் துணி 1350 ஆம் வருடத்துக்கு முந்தையதாக இருக்க வாய்ப்பே இல்லை என திட்டவட்டமாக கூறியிருக்கின்றன (பரிசோதனைக்கு எடுக்கப் பட்ட சாம்பிளே தப்பு. பதினைந்தாம் நூற்றாண்டு வாக்கில் இந்தத் துணி வைக்கப் பட்டிருந்த தேவாலயத்தில் ஏற்பட்ட தீ விபத்தில் இந்தத் துணியின் சில பகுதிகள் எரிந்து ஓட்டையாகி விட்டன .இந்த சேதமடைந்த பகுதிகளை அங்கிருந்த கன்னிமார் ஒருவர் ஊசி நூல் கொண்டு தைத்திருக்கிறார் (இதற்கு ஆதாரங்கள் இருக்கின்றன. 19-ஆம் நூற்றாண்டில் அப்படித் தைக்கப்பட்ட பகுதியிலிருந்து நூல் அப்புறப்படுத்தப்பட்டு துணி அதன் பழைய நிலையிலேயே தீ பட்ட ஓட்டைகளுடன் ரெஸ்டோர் செய்யப்பட்டுள்ளது- இந்த ஓட்டைகளைப் படத்தில் காணலாம்).கார்பன் டேட்டிங்கிற்கு எடுக்கப் பட்ட மாதிரி நூல் பிற்காலத்தில் துணியைத் தைக்கப பயன்பட்ட நூலின் பகுதி, அதனால்தான் பிற்காலத்தையது போல் முடிவுகள் கிடைத்துள்ளன)

3) எந்த ஒரு உடலையும் துணியில் சுற்றினாலும் அந்தத் துணியில் அந்த உருவம் பதியாது. அதுவும் உதடு கண்கள் போன்ற உள்ளடங்கிய பகுதிகள் கூட துல்லியமாகப் பதிய வாய்ப்பே இல்லை.அப்படியானால் அந்தக் காலத்தில் எத்தனையோ உடல்கள் மீது போர்த்தப் பட்ட சவப்போர்வைகள் உள்ளன அதிலெல்லாம் எந்த உருவமும் பதியவில்லை. இது வேண்டுமென்றே ஸ்டார்ச், கெமிகல் போன்றவற்றைக் கொண்டு ஒரு உருவத்தைப் பதிய வைத்து அது ஏசுநாதர்தான் என்று நம்ப வைத்து மதத்தைப் பரப்பும் பம்மாத்து வேலை. (செயற்கையான முறையில் செய்விக்கப்பட்டதென்றால் விஞ்ஞானம் வளர்ந்து விட்ட இன்றைய காலகட்டத்தில் கூட அது போன்று ஒரு உருவத்தைத் துணியில் பதிப்பித்துக் காட்ட முடியவில்லையே. மேலும் மூன்றாம் நாள் ஏசு உயிர்த்தெழுந்தபோது ஏற்பட்ட பிரகாசத்தின் காரணமாக உடல் பாகங்களின் மிக நுணுக்கமான பதிவுகள் துணியில் ஏற்பட்டுள்ளன- photo flash&energy theory)

4) இந்தத் துணியில் உள்ள கறைகள் மனித ரத்தம் இல்லை கெமிகல் சமாச்சாரம். (ரத்தம் தான்..ஆய்வில் ஹிமோக்ளோபின் உறுதி செய்யப்பட்டுள்ளது )
இப்படியாக முடிவில்லாத் தொடர்கதையாகப் போகிறது இந்த வாதங்கள். இதில் எந்தத் தரப்பு வாதத்தையும் புறந்தள்ளி விட முடியாதபடிக்கு இரண்டு பக்கமுமே படித்தவர்கள், அறிஞர்கள், விஞ்ஞானிகள் உள்ளதால் இன்னும் மெய்யா பொய்யா என்று நிரூபணமாகாமலேயே அவிழாத மர்ம முடிச்சாகவே தொடர்கிறது டூரின் சவப்போர்வை.
எது எப்படியோ 2010-ஆம் ஆண்டு பொது மக்கள் பார்வையிட 45 நாட்கள் அனுமதிக்கப் பட்ட போது, அந்த 45 நாட்களில் உலகமெங்கிலும் இருந்து வந்து இந்த டூரின் சவப்போர்வையைப் பார்த்துச் சென்றவர்களின் எண்ணிக்கை மட்டும் 20 லட்சம் பேர்.

அடுத்த மண்டே அன்று மர்மங்கள் தொடரும்...

-ச. சங்கர்

மினி மர்மம்: போன சனிக்கிழமை பெங்களூரில் ஒரு பூங்காவில் சில உருவங்கள் தெரிந்ததாம் :-)

Read More...

Monday, June 18, 2012

மண்டே மர்மங்கள் (1) - ச.சங்கர்

இந்த கட்டுரையை எழுதிய ச.சங்கர் இயந்திரவியல் பொறியாளர் ஒரு பன்னாட்டு நிறுவனத்தில் துணைப்பொது மேலாளராக பணி புரிகிறார். தமிழ் ஆர்வலர், நிறைந்த வாசிப்பனுபவம் உள்ளவர். வலையில் அவ்வப்போது எழுதுபவர். மர்மங்கள் பற்றி எழுதுவதால் அதற்கு இட்லிவடை தான் பொறுத்தம் என்று நினைத்துவிட்டார் என்று நினைக்கிறேன். அதனால் இட்லிவடைக்கு அனுப்பியுள்ளார்.

அவருடைய வலைத்தளம்: http://ssankar.blogspot.in/

அன்புடன்
இட்லிவடை

உலகின் தொடரும் மர்மங்கள் -1

பிரி ரெயிஸ் வரை படம் - (Piri Reis Map)

1929 ஆம் ஆண்டில் சில வரலாற்று ஆய்வாளர்கள் துருக்கி அரச மாளிகையில் மான் தோலில் வரையப்பட்ட ஒரு வரை படத்தைக் கண்டெடுத்தனர்.அந்த வரை படத்தை ஆய்வு செய்ததில் அது ஒரு உண்மையான ஆவணம் என்பதும் துருக்கிய ஆட்டமோன் மன்னரது கடல் படையில் உயரதிகாரியாக (அட்மிரலாக) இருந்த பிரி ரெயிஸ் என்பவரால் 1513 ஆம் வருடம் வரையப்பட்ட வரை படத்தின் பகுதி என்பதும் தெரிந்தது.



பிரி ரெயிஸ் வரைபடக்கலையில் (கார்டோக்ராஃபி) பேரார்வம் கொண்டிருந்தார். தனது ஆர்வத்தூண்டலினாலும், தனது கடல் அனுபத்தில் கிடைத்த தகவல்கள், வரைபடத் துண்டுகள், நூலகத்தில் கிடைத்த வரைபடங்கள் குறிப்புகள் இவற்றைக் கொண்டு அவர் ஒரு வரை படத்தை தொகுத்தார், துருக்கி படையில் அவருடைய உயரிய அந்தஸ்துள்ள பதவியினால் புகழ் பெற்ற கான்ஸ்டான்டிநோபிலில் இருந்த அரச வம்சத்து நூலகத்திலிருந்த ஆவணங்களை அணுகிப் பார்வையிட வாய்ப்பு அவருக்கு இருந்ததும் இந்த வரை படத்தை சித்தரிப்பதில் அவருக்கு மிக்க உறுதுணையாகி விட்டது.

தென் அமெரிக்காவின் கிழக்குக் கடற்கரையையும், ஆப்பிரிக்காவின் வடக்குக் கடற்கரையையும் இன்னும் சில பகுதிகளையும் அந்த வரைபடத்தில் அவர் சித்தரித்திருந்தார். இத்தனைக்கும் அவர் தென் அமெரிக்கக் கடற்கரைக்குச் சென்றதோ அதைக் கண்ணால் கண்டதோ இல்லை. அவருடைய வரை படத்தில் காணப்படும் பல்வேறு குறிப்புக்களிலேயே பிரி ரெயிஸ் தன்னுடைய வரைபடம் பல்வேறு மூல வரைபடங்களிலிருந்து தொகுத்தெழுதப்பட்ட ஒன்றே என்றும் அவற்றில் சில மூல வரைபடங்கள் கி.மு 400 முதலாக அல்லது அதற்கும் முன்னால் எழுதப்பட்டவை என்றும் குறிப்பிட்டுள்ளார். பல்வேறு மூல வரைபடங்கள், குறிப்புகள் ,செய்திகள் இவற்றின் மூலமே தொகுத்தளிக்கப்பட்ட வரைபடத்தில், கண்ணால் காணாத இடங்கள் குறிப்பிடப்பட்டுள்ள துல்லியம் ஆச்சரியப்பட வைக்கும் ஒன்றாக இருக்கிறது.



கண்டெடுக்கப்பட்ட பிறகு மிகவும் விவாதத்துக்குள்ளான பிரி ரெயிஸின் வரைபடம் ஆப்பிரிக்காவின் மேற்குக்கடற்கரையையும், தென் அமெரிக்காவின் கிழக்குக் கடற்கரையையும் மற்றும் அண்டார்டிகாவின் வடக்குக் கடற்கரையையும் ??!! சித்தரிப்பதாக சில வரைபட வல்லுனர்களும் வரலாற்று ஆய்வாளர்களும் கருதுகிறார்கள். இதில் ஆச்சரியம் என்ன என்கிறீர்களா.. இந்த வரைபட காலத்தில் அண்டார்டிகா என்ற கண்டம் கண்டு பிடிக்கப் படவே இல்லை. வரைபட காலத்துக்கு சில நூற்றாண்டுகளுக்குப் பின்னரே அண்டார்டிகா என்ற கண்டம் கண்டறியப்பட்டது. அதோடல்லாமல் அண்டார்டிகாவின் கடற்கரைப் பகுதியானது கிட்டத்தட்ட 1000 அடி கனமான பனியின் கீழ் மறைந்திருக்கிறது. அந்தப் பகுதியை யாராவது பார்த்திருந்து வரைபடத்தில் குறிக்க வேண்டுமானால், அது அந்தப் பகுதியில் பனியில்லாத காலமான கடைசி ice age காலத்திற்கு முற்பட்ட காலமாக இருந்திருக்க வேண்டும். அதாவது கிட்டத்தட்ட 6000 வருடங்களுக்கு முன்னால்.

நமக்குத் தெரிந்த வரலாற்றில் மனித நாகரீகம் தொடங்கியதே சுமார் 3000 ஆண்டுகளுக்கு முன்னர் தான். அப்படியானால் அதற்கும் முன்னால் நாகரீக வளர்ச்சியடைந்த, வரைபடங்களைத் துல்லியமாக கணிக்கக்கூடிய ஒரு சமூகம் இருந்ததா என்ற கேள்வி எழுந்து அதிர வைக்கிறது. அப்படி இருந்திருந்தால் எந்தச் சுவடும் இல்லாமல் எப்படி அழிந்திருக்கக் கூடும் என்ற கேள்விக்கும் பதில் கிடைக்கவில்லை. அதோடல்லாமல் இந்த மூல வரைபடங்களை வரைந்தவர்களுக்கு உலகம் உருண்டை வடிவமானது என்ற அறிவும் இருந்திருக்கிறது. வரைபட இயலில் சிறந்த ஆய்வாளரான அமெரிக்காவைச் சேர்ந்த ஆர்லிங்டன் மலோரி என்பவர் கோள கோணவியல் திரிகோண கணிதம் (spherical Trigonometry) நன்கு அறிந்தவர்களால் இந்த வரைபடங்கள் வரையப்பட்டிருக்கிறதென்றும், ஆகாய விமானத்தில் பறந்து ஏரியல் சர்வேயில் பார்த்திருந்தால் மட்டுமே இவ்வளவு துல்லியமாக வரைய இயலும் என்றும் கூறியிருப்பது இன்னும் திகைப்பில் ஆழ்த்துகிறது.

மறுபக்கத்தில் இது அந்தக் காலத்தில் கிடைத்த மூல வரைபடங்கள், கடலோடுபவர்களிடமிருந்து பெறப்பட்ட தகவல்கள் கொண்டு பிரி ரெயிஸினால் தொகுக்கப்பட்ட சாதாரண வரைபடமே அன்றி அசாதாரணமாக ஒன்றும் இல்லை என்று வாதிடுவோரும் உண்டு. பிரி ரெயிஸின் வரை படம் மிகத் துல்லியமானதல்ல.. தென் அமெரிக்காவின் கடற்கரையை (துல்லியமின்மை காரணமாக) வளைத்துக் காட்டப்பட்டிருக்கிறபடியால் அது அண்டார்டிகா கண்டத்தின் வட பகுதியைக் காட்டுவது போல் தோன்றுகிறதேயன்றி, அது அண்டார்டிகா கண்டத்தைக் காட்டவே இல்லை. மேலும் இது ஒரு ஆச்சரியகரமான வரைபடம் என்று வாதிடுபவர்கள் கேப்குட் என்ற அமெரிக்க அறிவியலாளரின் வாதத்தை மட்டுமே எடுத்து வைக்கிறார்களே அன்றி ஆய்வுகள் மேற்கொண்டு நிரூபணம் செய்யப்படவில்லை என்றும் எதிர் வாதிடுகின்றனர்.



எது எப்படியோ, சாதாரணமாக தொகுக்கப்பட்ட வரைபடமா அல்லது பல்லாயிரம் ஆண்டுகளுக்கு முன்பே வாழ்ந்த மனித இனத்துக்கு மிகவும் மேம்பட்ட அறிவியல் ஞானம் இருந்ததா என்ற கேள்விகளுக்கு விடையில்லாமல் இன்றும் அவிழ்க்க முடியாத ஒரு மர்ம முடிச்சாகவே நீடிக்கிறது பிரி ரெயிசின் வரைபடம்.

அடுத்த மண்டே அன்று மர்மங்கள் தொடரும்...

-ச. சங்கர்

Read More...